अग्रसरताका निम्ति पढाई भन्ने नाराका साथ विद्या सागर इंलिस सेकेण्डरी स्कुलमा २८ औं अभिभावक दिवस, शैक्षिक प्रदर्शनी तथा फुड फन आयोजना गरिएको छ । बनेपा नगरपालिकाका नगर प्रमुख शान्तिरत्न शाक्यले शैक्षिक प्रदर्शनीको अवलोकन गरेका थिए ।

उनले विद्यार्थीलाई कुनै पनि काम सानो हुँदै भन्ने सिकाउन शिक्षक अभिभावकलाई आग्रह गरेका छन । विद्या सागर स्कुलले व्यवहारिक ज्ञानलाई प्राथमिकता दिएको भन्दै उनले खुसी व्यक्त गरेका छन । विद्या सागर स्कुलले हरेक वर्ष शैक्षिक मेलाका रुपमा विविध कार्यक्रम सहित अभिभावक दिवस मनाउँदै आएको छ ।

हिजो विहिबारबाट सुरु भएको कार्यक्रम ३ दिनसम्म सञ्चालन हुने विद्या सागर स्कुलका प्रिन्सिपल हिरा शर्मा नेपालले जानकारी दिए । अभिभावलाई समेत शैक्षिक प्रदर्शनी अवलोकनका लागि निमन्त्रणा गरिएको छ ।

विद्यार्थीको प्रतिभा प्रदर्शन, नयाँ नयाँ विषयको जानकारी, मौलिक सम्पदा संरक्षणको लागि साँस्कृतिक कार्यक्रम तथा स्थानीय परिकारको प्रवद्र्धनका लागि शैक्षिक मेला आयोजना गरिएको विद्यालयका चिफ कोर्डिनेटर विनय मग्रातीले जानकारी दिएका छन ।

शैक्षिक प्रदर्शनीमा कक्षा ८, ९, र १० का विद्यार्थीले बनाएका डाइनोसरको आकृति राखिएको छ । बाँस, ह्वाइट सिमेन्ट, लगायतका सामाग्री प्रयोग गरेर ३ दिनमा डाइनोसर बनाइएको विद्यार्थी विशाल श्रेष्ठले बताए ।

कलाका विषयलाई समेत प्रदर्शनीमा प्राथमिकताका साथ राखिएको छ । गणित, विज्ञान, सामाजिक विषयका विषयवस्तुलाई विद्यार्थीले अलक अलग प्रदर्शनी स्टल मार्फत जानकारी गराइरहेका छन ।
स्थानीय परिकारलाई समेत प्रदर्शनीमा समावेश गरिएको छ ।

विद्यार्थी र शिक्षक मिलेर बनाएको स्थानीय खानेकुरा मम, बारा, योमरीको प्रदर्शनी र विक्रिवितरण गरिएको छ । यस्तै विद्यालयमा नै विद्यार्थीले तयार पारेको विभिन्न परिकारका अचार समेत प्रदर्शनीमा राखिएको छ ।

विद्यालयले विद्यार्थीलाई टपरी बनाउन समेत सिकाएको छ । विद्यालयको प्रांगणमा विद्यार्थीहरु टपरी बनाइरहेको भेटिन्छन् । विवाह, ब्रतबन्ध, लगायतका शुभ कार्यमा टपरी अनिवार्य मानिन्छ ।

विद्यालयले अभिभावक दिवसको अवसर पारेर साहित्यिक उत्सव समेत आयोजना गरेको छ । । यस अन्तर्गत कविता वाचन, अंग्रेजी नेपाली बुक टक हुनेछ ।

नेपाली साहित्य बारे साहित्यकार सकुन्ताला जोशीले जानकारी गराएकी थिइन् । उनले आफ्नो पुस्तक आदिम सिमानाका बारेमा जानकारी गराएकी थिइन् । डिजिटल प्रविधिका विषय समेत प्रदर्शनीमा राखिएको छ ।

यस्तै सास्कृतिक कार्यक्रम समेत छन । विद्यार्थीले संस्कृति झल्कने गित, नृत्य, जनचेतनामुलक नाटक पस्तुत गरिरहेका छन । हरेक वर्ष अभिभावक दिवसको रुपमा कार्यक्रम हुँदै आइरहेको छ । विद्या सागर स्कुलले अभिभावक दिवसलाई शैक्षिक मेलाको रुपमा मनाउने गरेको छ ।