आर्थिक वर्ष सकिन २ महिना १० दिन बाँकी हुँदा बजेट कटौती भए पछि सकसमा स्थानीय तह

चालु आर्थिक वर्ष सकिन दुई महिना १० दिन बाँकी हुँदा स्थानीय तहमा २५.८९ प्रतिशत बजेट कटौती भए पछि सम्पन्न हुने चरणमा रहेका योजनाहरु अलपत्र हुने अवस्थामा पुगेका छन् ।

मोतीराम तिमल्सिना
धुलिखेल
संघीय सरकारले स्थानीय सरकारलाई विनियोजन गरेको चालु वर्षको समानिकरण अनुदानमा भारी कटौती गरेको छ । ७ सय ५३ वटै स्थानीय तहमा विनियोजन भएको अनुदानमा २५.८९ प्रतिशतले कटौती गरेको कोष तथा लेखा नियन्त्रक कार्यालयले जानकारी दिएको छ ।

जिल्लाका १३ वटा पालिकामा विनियोजन गरेको अनुदानमा ३४ करोड ७९ लाख ६१ हजार ६ सय रुपैया कटौती भएको छ । यसका अलावा भ्याट बापतको बाँडफाँड रकम पनि कटौतीमा परेको छ भने युरोपियन युनियनले उपलब्ध गराएको पहिलो किस्ता बाहेकको अन्य सबै किस्ता रकम पनि कटौती भएको छ । मालपोतको राजश्व बाँडफाँडमा पनि स्थानीय तहको राजश्व कटौती भएको छ । श्रोत सुनिश्चित जस्तै हुने गरी छनौट गरिएका योजनाहरु आर्थिक वर्षको अन्त्यमा अन्योलमा पर्ने भएका छन् । अन्तिम तथा चौथो किस्ता निकासको क्रममा वाँकी रकमबाट २५.८९ प्रतिशत रकम कटौती गरिएको कोष तथा लेखा नियन्त्रकको कार्यालयले जानकारी दिएको छ ।

जिल्लाका १३ पालिकाहरुमा विनियोजन समानीकरण अनुदान मध्ये सबै भन्दा धेरै बनेपा नगरपालिकाको अनुदान कटौती भएको छ । बनेपाले प्राप्त गरेको कुल बजेट १५ करोड ९२ लाखबाट ४ करोड १२ लाख रुपैया कटौती भएको छ । धुलिखेलको रकम धेरै कटौती भएको छ । धुलिखेलले प्राप्त गरेको ११ करोड ७२ लाख रुपैया मध्ये ३ करोड ३ लाख रुपैया कटौती भएको छ । नगरपालिकाहरु मध्ये पनौतीले प्राप्त गरेको १३ करोड ८६ लाख मध्ये ३ करोड ५८ लाख कटौती भएको छ । पाँचखाल नगरपालिकाको १२ करोड २६ लाख मध्ये ३ करोड १७ लाख कटौतीमा परेको छ । नमोबुद्धको १० करोड ३८ लाख मध्ये २ करोड ६८ लाख रुपैया कटौती भएको छ । मण्डनदेउपुर नगरपालिकाको १० करोड ८५ लाख मध्ये २ करोड ८० लाख कटौतीमा परेको छ ।

खानीखोला गाउँपालिकाको ७ करोड ३३ लाख रुपैया मध्ये १ करोड ८९ लाख कटौतीमा परेको छ । चौरीदेउराली गाउँपालिकाको ८ करोड ८० लाखमा २ करोड २७ लाख कटौतीमा परेको छ । तेमाल गाउँपालिकाको ९ करोड ४ लाख रुपैयामा २ करोड ३४ लाख कटौतीमा परेको छ । बेथान्चोक गाउँपालिकाको ८ करोड रुपैयामा २ करोड कटौती भएको छ । भुम्लु गाउँपालिकाको ८ करोड १६ लाखमा २ करोड १२ लाख रुपैया कटौती भएको छ । महाभारत गाउँपालिकाको ७ करोड ९० लाखमा २ करोड ४ लाख रुपैया कटौतीमा परेको छ । त्यस्तै रोशी गाउँपालिकाको १० करोड १५ लाख रुपैयामा २ करोड ६२ लाख रुपैया कटौती भएको छ । काभ्रेका लागि १३ वटा पालिकाले प्राप्त गरेको १ अर्ब ३४ करोड ४० लाख रुपैयामा ९९ करोड ६० लाख ३८ हजार ४ सय रुपैया निकासा भएको छ ।

त्यस्तै जिल्लाका १३ वटै पालिकाका लागि युरोपियन युनियनद्वारा प्राप्त ३/३ लाख रुपैया अनुदानमा २ करोड २५ लाख कटौती भएको छ । पहिलो किस्ता बापतको ७५ हजार रुपैया खर्च भए पनि बाँकी रकम कटौतीमा परेको हो । शुरु भएका योजनाहरु पनि रकम कटौतीसँगै अलपत्र हुने भएका छन् । त्यस्तै पालिकामा समानिकरण जस्तै भ्याटको बाँडफाँडबाट प्राप्त हुने अनुदान पनि कटौतीमा परेको छ ।