परमार्थ के हो

परम तत्व के हो के हो परमार्थ जान्ने जिज्ञासा भई,

सत्संगका लागि भौतारिएछु म त टाढा टाढासम्म गई,

आफैंभित्र लुकेको रहेछ यो परम तत्व हृदयमा गाढा,

गहिरिएर हेर्नुपर्ने रहेछ नि आफै भित्र पन्छाई द्वेषका काँडा,

परमार्थ पनि त्यही रहेछ म भित्रको त्यो मलाई चिन्नु,

गहन ध्यानमा मग्न भई प्राणायामले स्वहंलाई जान्नु,

सतहको म र मेरो मा मात्र अल्मलिदा त वास्तविक म यो,

भेटेर साक्षात्कार गर्न त आकाशको तारा भेट्नु जस्तै पो भयो,

म चिन्न सकेमा मात्र मानवताको भाव हामीभित्र सलबलाउँछ,

मनलाई हेर्ने दर्पणमा जमेको मैलो पुछौँ त म चिन्न सघाउँछ,

सबै भित्र विद्यमान त्यो म तत्व त्यसैलाई आत्मा भनि जान्नु छ,

त्यसलाई निर्देशित गर्ने परमात्मा हो जसलाई परमतत्व जान्नु छ,

 राग र द्वेष पालेर जब आफैंभित्र मात्र आत्मा जागृत छ भनि ठान्दा,

गम्भीर भूल हामीबाट हुन्छ नि केवल म र मेरो मात्र सोचाइ राख्दा,

परमार्थी त्यो नै हो जसले आत्मा र परमात्माको समानता बुझ्दछ,

मलाई जस्तै उसलाई पनि त्यस्तै चाहना हुन्छ भनि ठान्दछ,,

सत्संगबाट थाहा भयो भक्तिरस रसाउन पर्ने रहेछ परमार्थ भेट्न,

त्यही रसले बगाउनु पर्ने रहेछ मनको मैलो परमात्मालाई देख्न।